साउथ अफ्रिका ८ विकेटले विजयी

न्युजिल्याण्ड विरुद्धको पहिलो टेष्टमा साउथ अफ्रिका ८ विकेटले विजयी भएको छ । न्युजिल्याण्डले प्रस्तुत गरेको ८१ रनको लक्ष्य उसले २४.३ ओभरमा ८३ रन बनाउँदै पुरा गर्यो । ओपरन स्टेफन कुक ११ तथा डिन एल्गर १७ रनमा आउट भएपनि हसिम अम्ला र जेपी डुमिनी अविजित रहे । अम्लाले ६१ बलमा ५ चौकाको सहायतामा ३८ तथा १६ बलको सामना गरेका डुमिनीले २ चौकाको सहायतामा १५ रन जोडेपछि टोलीले जित हात पारेको हो । 

यसअघि साउथ अफ्रिकाले पहिलो इनिङ्गमा क्विनटोन डे कोकको ९१ , टेम्बा बाबुमाको ८९ तथा भेरनोन फिलाण्डरको ३७ रनको मद्दतमा ९८ ओभरमै समेटिएपनि ३ सय ५९ रन जोडेको थियो । 

न्युजिल्याण्डले भने पहिलो इनिङ्गमा हेन्री निकोल्सको एक सय १८, ओपनर जित रावलको ३६ तथा विकेट किपर ब्राडली वाट्लिङ्गको ३४ रनको मद्दतमा ७९.३ ओभरमा २ सय ६८ रन बनाएको थियो । तर दोस्रो इनिङ्गमा न्युजिल्याण्ड ६३.२ ओभरमा मात्र एक सय ७१ रनमा समेटिएको थियो । उसका लागि ओपनर जित रावलले ८०, ब्राड्ली वाट्लिङ्गले २९ र नेल ब्रुमले २० रन जोड्न बाहेक अन्यले दोहोरो अंकको स्कोर जोड्न सकेनन् ।

न्युजिल्याण्डलाई दोस्रो इनिङ्गमा सस्तैमा समेट्न ६ विकेट लिएका केशव महाराज म्यान अफ दी म्याच घोषित भए । जितसँगै साउथ अफ्रिकाले तीन टेष्ट म्याचको श्रृंखलामा एक शुन्यको अग्रता लिएको छ ।

५ चैत्र,२०७३